Legiōnis nōnae et decimae mīlitēs, ut in sinistrā parte aciē cōnstiterant, pīlīs ēmissīs cursū ac lassitūdine exanimātōs volneribusque cōnfectōs Atrebātēs — nam hīs ea pars obvēnerat — celeriter ex locō superiōre in flūmen compulērunt, et trānsīre cōnantīs īnsecūtī gladiīs māgnam partem eōrum impedītam interfēcērunt. Ipsī trānsīre flūmen nōn dubitāvērunt, et in locum inīquum prōgressī rūrsus resistentīs hostīs redintegrātō proeliō in fugam coniēcērunt. Item aliā in parte dīversae duae legiōnēs, ūndecima et octāva, prōflīgātīs Viromanduīs, quibuscum erant congressī, ex locō superiōre in ipsīs flūminis rīpīs proeliābantur. At tōtīs ferē castrīs ā fronte et ab sinistrā parte nūdātīs, cum in dextrō cornū legiō duodecima et nōn māgnō ab eā intervāllō septima cōnstitisset, omnēs Nerviī cōnfertissimō agmine duce Boduōgnātō, quī summam imperī tenēbat, ad eum locum contendērunt; quōrum pars apertō latere legiōnēs circumvenīre, pars summum castrōrum locum petere coepit.
Gradus IVLitterae
Textus et quantitātēs ex ēditiōne Greenough (1898), rēgulīs nostrīs adhibitīs. Fontēs et ratiō ēdendī →