Caesar cum septimam legiōnem, quae iūxtā cōnstiterat, item urgērī ab hoste vīdisset, tribūnōs mīlitum monuit ut paulātim sēsē legiōnēs coniungerent et conversa sīgna in hostīs īnferrent. Quō factō, cum alius aliī subsidium ferret neque timērent nē āversī ab hoste circumvenīrentur, audācius resistere ac fortius pūgnāre coepērunt. Interim mīlitēs legiōnum duārum quae in novissimō agmine praesidiō impedīmentīs fuerant, proeliō nūntiātō, cursū incitātō in summō colle ab hostibus cōnspiciēbantur; et T. Labiēnus castrīs hostium potītus et ex locō superiōre quae rēs in nostrīs castrīs gererentur cōnspicātus, decimam legiōnem subsidiō nostrīs mīsit. Quī, cum ex equitum et cālōnum fugā quō in locō rēs esset quantōque in perīculō et castra et legiōnēs et imperātor versārētur cōgnōvissent, nihil ad celeritātem sibī reliquī fēcērunt.
Gradus IVLitterae
Textus et quantitātēs ex ēditiōne Greenough (1898), rēgulīs nostrīs adhibitīs. Fontēs et ratiō ēdendī →