Erant hae difficultātēs bellī gerendī quās suprā ostendimus, sed tamen multa Caesarem ad id bellum incitābant: iniūria retentōrum equitum Rōmānōrum, rebelliō facta post dēditiōnem, dēfectiō datīs obsidibus, tot cīvitātum coniūrātiō, imprīmīs nē hāc parte neglēctā reliquae nātiōnēs sibī idem licēre arbitrārentur. Itaque cum intellegeret omnīs ferē Gallōs novīs rēbus studēre et ad bellum mōbiliter celeriterque excitārī, omnīs autem hominēs nātūrā lībertātī studēre et condiciōnem servitūtis ōdisse, priusquam plūrēs cīvitātēs cōnspīrārent, partiendum sibī ac lātius distribuendum exercitum putāvit.
Gradus IVLitterae
Textus et quantitātēs ex ēditiōne Greenough (1898), rēgulīs nostrīs adhibitīs. Fontēs et ratiō ēdendī →