Atque in eam rem omnium nostrōrum intentīs animīs, aliā ex parte oppidī Adiatunnus, quī summam imperī tenēbat, cum DC dēvōtīs, quōs illī solduriōs appellant, — quōrum haec est condiciō utī omnibus in vītā commodīs ūnā cum eīs fruantur quōrum sē amīcitiae dēdiderint; sī quid hīs per vim accidat, aut eundem cāsum ūnā ferant aut sibī mortem cōnscīscant; neque adhūc hominum memoriā repertus est quisquam quī, eō interfectō cuius sē amīcitiae dēvōvisset, mortem recūsāret, — cum hīs Adiatunnus ēruptiōnem facere cōnātus, clāmōre ab eā parte mūnītiōnis sublātō, cum ad arma mīlitēs concurrissent vehementerque ibī pūgnātum esset, repulsus in oppidum tamen utī eādem dēditiōnis condiciōne ūterētur ā Crassō impetrāvit.
Gradus IVLitterae
Textus et quantitātēs ex ēditiōne Greenough (1898), rēgulīs nostrīs adhibitīs. Fontēs et ratiō ēdendī →