Itaque nōndum hieme cōnfectā, proximīs IIII coāctīs legiōnibus dē imprōvīsō in fīnīs Nerviōrum contendit, et prius quam illī aut convenīre aut profugere possent, māgnō pecoris atque hominum numerō captō atque eā praedā mīlitibus concessā vāstātīsque agrīs, in dēditiōnem venīre atque obsidēs sibī dare coēgit. Eō celeriter cōnfectō negōtiō, rūrsus in hīberna legiōnēs redūxit. Conciliō Galliae prīmō vēre, ut īnstituerat, indīctō, cum reliquī praeter Senonēs, Carnūtēs, Trēverōsque vēnissent, initium bellī ac dēfectiōnis hoc esse arbitrātus, ut omnia postpōnere vidērētur, concilium Lutetiam Parīsiōrum trānsfert. Cōnfīnēs erant hī Senonibus cīvitātemque patrum memoriā coniūnxerant; sed ab hōc cōnsiliō āfuisse exīstimābantur. Hāc rē prō suggestū prōnūntiātā eōdem diē cum legiōnibus in Senonēs proficīscitur māgnīsque itineribus eō pervēnit.
Gradus IVLitterae
Textus et quantitātēs ex ēditiōne Greenough (1898), rēgulīs nostrīs adhibitīs. Fontēs et ratiō ēdendī →