Partītō exercitū T. Labiēnum cum legiōnibus tribus ad Ōceanum versus in eās partīs quae Menapiōs attingunt proficīscī iubet; C. Trebōnium cum parī legiōnum numerō ad eam regiōnem quae Aduatucīs adiacet dēpopulandam mittit; ipse cum reliquīs III ad flūmen Scaldim, quod īnfluit in Mosam, extrēmāsque Arduennae partīs īre cōnstituit, quō cum paucīs equitibus profectum Ambiorigem audiēbat. Discēdēns post diem VII sēsē reversūrum cōnfīrmat; quam ad diem eī legiōnī quae in praesidiō relinquēbātur frūmentum dēbērī sciēbat. Labiēnum Trebōniumque hortātur, sī reī pūblicae commodō facere possint, ad eum diem revertantur; ut, rūrsus commūnicātō cōnsiliō explōrātīsque hostium ratiōnibus, aliud initium bellī capere possint.
Gradus IVLitterae
Textus et quantitātēs ex ēditiōne Greenough (1898), rēgulīs nostrīs adhibitīs. Fontēs et ratiō ēdendī →