Omnī Galliā dēvictā Caesar cum ā superiōre aestāte nūllum bellandī tempus intermīsisset mīlitēsque hībernōrum quiētē reficere ā tantīs labōribus vellet, complūrēs eōdem tempore cīvitātēs renovāre bellī cōnsilia nūntiābantur coniūrātiōnēsque facere.
Cuius reī vērī similis causa adferēbātur, quod Gallīs omnibus cōgnitum esset neque ūllā multitūdine in ūnum locum coāctā resistī posse [ā] Rōmānīs, nec, sī dīversa bella complūrēs eōdem tempore intulissent cīvitātēs, satis auxiliī aut spatiī aut cōpiārum habitūrum exercitum populī Rōmānī ad omnia persequenda; nōn esse autem alicui cīvitātī sortem incommodī recūsandam, sī tālī morā reliquae possent sē vindicāre in lībertātem.