At Drappes ūnāque Lucterius, cum legiōnēs Canīniumque adesse cōgnōscerent nec sē sine certā perniciē persequente exercitū putārent prōvinciae fīnēs intrāre posse nec iam līberē vagandī latrōciniōrumque faciendōrum facultātem habērent, in fīnibus cōnsistunt Cadurcōrum.
Ibī cum Lucterius apud suōs cīvēs quondam integrīs rēbus multum potuisset, semperque auctor novōrum cōnsiliōrum māgnam apud barbarōs auctōritātem habēret, oppidum Uxellodūnum, quod in clientēlā fuerat eius, ēgregiē nātūrā locī mūnītum, occupat suīs et Drappetis cōpiīs oppidānōsque sibī coniungit.