Nōn intermittunt interim cotīdiāna proelia in cōnspectū utrōrumque castrōrum, quae ad vada trānsitūsque fīēbant palūdis.
Quā contentiōne Germānī, quōs proptereā Caesar trānsdūxerat Rhēnum ut equitibus interpositī proeliārentur, cum cōnstantius ūniversī palūdem trānsīssent paucīsque resistentibus interfectīs pertinācius reliquam multitūdinem essent īnsecūtī, perterritī nōn sōlum iī quī aut comminus opprimēbantur aut ēminus vulnerābantur, sed etiam quī longius subsidiārī cōnsuēverant, turpiter refūgērunt, nec prius fīnem fugae fēcērunt saepe āmissīs superiōribus locīs quam sē aut in castra suōrum reciperent, aut nōn nūllī pudōre coāctī longius profugerent.
Quōrum perīculō sīc omnēs cōpiae sunt perturbātae ut vix iūdicārī posset, utrum secundīs minimīsque rēbus īnsolentiōrēs an adversō mediocrī cāsū timidiōrēs essent.