Cum fāma exercitūs ad hostēs esset perlāta, calamitāte cēterōrum ductī Carnūtēs dēsertīs vīcīs oppidīsque, quae tolerandae hiemis causā cōnstitūtīs repente exiguīs ad necessitātem aedificiīs incolēbant (nūper enim dēvictī complūra oppida āmīserant), dispersī profugiunt.
Caesar ērumpentēs eō maximē tempore ācerrimās tempestātēs cum subīre mīlitēs nōllet, in oppidō Carnūtum Cēnabō castra pōnit atque in tēcta partim Gallōrum, partim quae collēctīs celeriter strāmentīs [tentōriōrum integendōrum grātiā] erant inaedificāta, mīlitēs compēgit.
Equitēs tamen et auxiliāriōs peditēs in omnēs partēs mittit quāscumque petīsse dīcēbantur hostēs; nec frūstrā:
nam plērumque māgnā praedā potītī nostrī revertuntur. Oppressī Carnūtēs hiemis difficultāte, terrōre perīculī, cum tēctīs expulsī nūllō locō diūtius cōnsistere audērent nec silvārum praesidiō tempestātibus dūrissimīs tegī possent, dispersī māgnā parte āmissā suōrum dissipantur in fīnitimās cīvitātēs.