Caesar cum complūrēs suōs vulnerārī vidēret, ex omnibus oppidī partibus cohortēs montem ascendere et simulātiōne moenium occupandōrum clāmōrem undique iubet tollere.
Quō factō perterritī oppidānī, cum quid agerētur in locīs reliquīs essent suspēnsī, revocant ab impūgnandīs operibus armātōs mūrīsque dispōnunt.
Ita nostrī fīne proeliī factō celeriter opera flammā comprehēnsa partim restinguunt, partim interscindunt.
Cum pertināciter resisterent oppidānī, māgnā etiam parte suōrum sitī āmissā in sententiā permanērent, ad postrēmum cunīculīs vēnae fontis intercīsae sunt atque āversae.
Quō factō repente perennis exāruit fōns tantamque attulit oppidānīs salūtis dēspērātiōnem, ut id nōn hominum cōnsiliō, sed deōrum voluntāte factum putārent. Itaque sē necessitāte coāctī trādidērunt.