Cassivellaunus, ut suprā dēmōnstrāvimus, omnī dēpositā spē contentiōnis, dīmissīs ampliōribus cōpiīs, mīlibus circiter IIII essedāriōrum relictīs itinera nostra servābat; paulumque ex viā excēdēbat locīsque impedītīs ac silvestribus sēsē occultābat atque eīs regiōnibus quibus nōs iter factūrōs cōgnōverat pecora atque hominēs ex agrīs in silvās compellēbat; et cum equitātus noster līberius praedandī vāstandīque causā sē in agrōs ēiēcerat, omnibus viīs sēmitīsque essedāriōs ex silvīs ēmittēbat; et māgnō cum perīculō nostrōrum equitum cum eīs cōnflīgēbat atque hōc metū lātius vagārī prohibēbat. Relinquēbātur ut neque longius ab agmine legiōnum discēdī Caesar paterētur, et tantum in agrīs vāstandīs incendiīsque faciendīs hostibus nocērētur quantum in labōre atque itinere legiōnāriī mīlitēs efficere poterant.
Gradus IVLitterae
Textus et quantitātēs ex ēditiōne Greenough (1898), rēgulīs nostrīs adhibitīs. Fontēs et ratiō ēdendī →