Cum iam mūrō turrēs adpropinquāssent, ex captīvīs Caesar cōgnōvit Vercingetorigem cōnsūmptō pābulō castra mōvisse propius Avaricum, atque ipsum cum equitātū expedītīsque quī inter equitēs proeliārī cōnsuēssent, īnsidiandī causā eō profectum quō nostrōs posterō diē pābulātum ventūrōs arbitrārētur. Quibus rēbus cōgnitīs mediā nocte silentiō profectus ad hostium castra māne pervēnit. Illī, celeriter per explōrātōrēs adventū Caesaris cōgnitō, carrōs impedīmentaque sua in artiōrēs silvās abdidērunt, cōpiās omnīs in locō ēditō atque apertō īnstrūxērunt. Quā rē nūntiātā Caesar celeriter sarcinās cōnferrī, arma expedīrī iussit.
Gradus IVLitterae
Textus et quantitātēs ex ēditiōne Greenough (1898), rēgulīs nostrīs adhibitīs. Fontēs et ratiō ēdendī →