Interim eī quī ad alteram partem oppidī, ut suprā dēmōnstrāvimus, mūnītiōnis causā convēnerant, prīmō exaudītō clāmōre, inde etiam crēbrīs nūntiīs incitātī oppidum ab Rōmānīs tenērī, praemissīs equitibus māgnō cursū eō contendērunt. Eōrum ut quisque prīmus vēnerat, sub mūrō cōnsistēbat suōrumque pūgnantium numerum augēbat. Quōrum cum māgna multitūdō convēnisset, mātrēs familiae, quae paulō ante Rōmānīs dē mūrō manūs tendēbant, suōs obtestārī et mōre Gallicō passum capillum ostentāre līberōsque in cōnspectum prōferre coepērunt. Erat Rōmānīs nec locō nec numerō aequa contentiō; simul et cursū et spatiō pūgnae dēfatīgātī nōn facile recentīs atque integrōs sustinēbant.
Gradus IVLitterae
Textus et quantitātēs ex ēditiōne Greenough (1898), rēgulīs nostrīs adhibitīs. Fontēs et ratiō ēdendī →