Dum haec ad Gergoviam geruntur, Haeduī prīmīs nūntiīs ab Litavīcō acceptīs nūllum sibī ad cōgnōscendum spatium relinquunt. Impellit aliōs avāritia, aliōs īrācundia et temeritās, quae maximē illī hominum generī est innāta, ut levem audītiōnem habeant prō rē compertā. Bona cīvium Rōmānōrum dīripiunt, caedīs faciunt, in servitūtem abstrahunt. Adiuvat rem prōclīnātam Convictolitavis plēbemque ad furōrem impellit, ut facinore admissō ad sānitātem revertī pudeat. M. Aristium, tribūnum mīlitum, iter ad legiōnēs facientem, fidē datā ex oppidō Cabillōnō ēdūcunt; idem facere cōgunt eōs quī negōtiandī causā ibī cōnstiterant. Hōs continuō in itinere adortī omnibus impedīmentīs exuunt; repugnantīs diem noctemque obsident; multīs utrimque interfectīs māiōrem multitūdinem ad arma concitant.
Gradus IVLitterae
Textus et quantitātēs ex ēditiōne Greenough (1898), rēgulīs nostrīs adhibitīs. Fontēs et ratiō ēdendī →