Hīs rēbus cōgnitīs Caesar Labiēnum cum cohortibus vi subsidiō labōrantibus mittit. Imperat, sī sustinēre nōn possit, dēductīs cohortibus ēruptiōne pūgnet; id nisi necessāriō nē faciat. Ipse adit reliquōs; cohortātur nē labōrī succumbant; omnium superiōrum dīmicātiōnum frūctum in eō diē atque hōrā docet cōnsistere. Interiōrēs, dēspērātīs campestribus locīs propter māgnitūdinem mūnītiōnum, loca praerupta [ex] ascēnsū temptant; hūc ea quae parāverant cōnferunt. Multitūdine tēlōrum ex turribus prōpūgnantīs dēturbant, aggere et crātibus fossās explent, falcibus vallum ac lōrīcam rescindunt.
Gradus IVLitterae
Textus et quantitātēs ex ēditiōne Greenough (1898), rēgulīs nostrīs adhibitīs. Fontēs et ratiō ēdendī →