Hostēs rē novā perterritī, mūrō turribusque dēiectī, in forō ac locīs patentiōribus cuneātim cōnstitērunt, hōc animō ut, sī quā ex parte obviam [contrā] venīrētur, aciē īnstrūctā dēpūgnārent. Ubī nēminem in aequum locum sēsē dēmittere, sed tōtō undique mūrō circumfundī vīdērunt, veritī nē omnīnō spēs fugae tollerētur, abiectīs armīs ultimās oppidī partīs continentī impetū petīvērunt; parsque ibī, cum angustō exitū portārum sē ipsī premerent, ā mīlitibus, pars iam ēgressa portīs ab equitibus est interfecta; nec fuit quisquam quī praedae studēret. Sīc et Cēnabēnsī caede et labōre operis incitātī nōn aetāte cōnfectīs, nōn mulieribus, nōn īnfantibus pepercērunt. Dēnique ex omnī numerō, quī fuit circiter mīlium XL, vix DCCC, quī prīmō clāmōre audītō sē ex oppidō ēiēcerant, incolumēs ad Vercingetorigem pervēnērunt. Quōs ille multā iam nocte silentiō ex fugā excēpit, et veritus nē qua in castrīs ex eōrum concursū et misericordiā volgī sēditiō orerētur, [ut,] procul in viā dispositīs familiāribus suīs prīncipibusque cīvitātum, disparandōs dēdūcendōsque ad suōs cūrāvit, quae cuique cīvitātī pars castrōrum ab initiō obvēnerat.
Gradus IVLitterae
Textus et quantitātēs ex ēditiōne Greenough (1898), rēgulīs nostrīs adhibitīs. Fontēs et ratiō ēdendī →