Bis māgnō cum dētrimentō repulsī Gallī quid agant cōnsulunt. Locōrum perītōs adhibent; ex hīs superiōrum castrōrum sitūs mūnītiōnēsque cōgnōscunt. Erat ā septentriōnibus collis, quem propter māgnitūdinem circuitūs opere circumplectī nōn potuerant nostrī; necessāriōque paene inīquō locō et lēniter dēclīvī castra fēcerant. Haec C. Antistius Rēgīnus et C. Canīnius Rebilus lēgātī cum duābus legiōnibus obtinēbant. Cōgnitīs per explōrātōrēs regiōnibus ducēs hostium LX mīlia ex omnī numerō dēligunt, eārum cīvitātum quae maximam virtūtis opīniōnem habēbant; quid quōque pactō agī placeat occultē inter sē cōnstituunt; adeundī tempus dēfīniunt cum merīdiēs esse videātur. Hīs cōpiīs Vercassivellaunum Arvernum, ūnum ex IIII ducibus, propinquum Vercingetorigis, praeficiunt. Ille ex castrīs prīmā vigiliā ēgressus, prope cōnfectō sub lūcem itinere, post montem sē occultāvit mīlitēsque ex nocturnō labōre sēsē reficere iussit. Cum iam merīdiēs adpropinquāre vidērētur, ad ea castra quae suprā dēmōnstrāvimus contendit; eōdemque tempore equitātus ad campestrīs mūnītiōnēs accēdere et reliquae cōpiae prō castrīs sēsē ostendere coepērunt.
Gradus IVLitterae
Textus et quantitātēs ex ēditiōne Greenough (1898), rēgulīs nostrīs adhibitīs. Fontēs et ratiō ēdendī →