Cum uterque utrimque exīsset exercitus, in cōnspectū ferēque ē regiōne castrīs castra pōnēbant. Dispositīs explōrātōribus, nēcubi effectō ponte Rōmānī cōpiās trādūcerent, erat in māgnīs Caesarī difficultātibus rēs nē māiōrem aestātis partem flūmine impedīrētur; quod nōn ferē ante autumnum Elaver vadō trānsīrī solet. Itaque, nē id accideret, silvestrī locō castrīs positīs, ē regiōne ūnīus eōrum pontium quōs Vercingetorīx rescindendōs cūrāverat, posterō diē cum duābus legiōnibus in occultō restitit; reliquās cōpiās cum omnibus impedīmentīs, ut cōnsuērat, mīsit, distractīs quibusdam cohortibus, ut numerus legiōnum cōnstāre vidērētur. Hīs quam longissimē possent prōgredī iussīs, cum iam ex diēī tempore coniectūram caperet in castra perventum, īsdem sublicīs, quārum pars īnferior integra remanēbat, pontem reficere coepit. Celeriter effectō opere legiōnibusque trāductīs et locō castrīs idōneō dēlēctō, reliquās cōpiās revocāvit. Vercingetorīx rē cōgnitā, nē contrā suam voluntātem dīmicāre cōgerētur, māgnīs itineribus antecessit.
Gradus IVLitterae
Textus et quantitātēs ex ēditiōne Greenough (1898), rēgulīs nostrīs adhibitīs. Fontēs et ratiō ēdendī →